Grok Bot
وكيل الذكاء الاصطناعي من xAI
دليل من إعداد حلول الذكاء الاصطناعي في التعليم
تابعنا لآخر تحديثات الذكاء الاصطناعي
وش هو Grok Bot؟
Grok Bot مساعد ذكاء اصطناعي من شركة xAI.
الفكرة ببساطة: بدل ما يعطيك جواب وأنت تنفذ، هو ينفذ بنفسه. عنده كمبيوتر سحابي خاص فيه يشتغل عليه عن بعد، يدخل مواقعك وتطبيقاتك ويسوي المهمة، ويرجع لك لما يحتاجك.
مثلا: بدل ما يشرح لك كيف تقارن الأسعار، يدخل المتاجر بنفسه ويجيب لك المقارنة جاهزة.
تقدر تكلمه من الكمبيوتر أو الجوال مثل ما تكلم شخص في محادثة.
- الشات بوت يجاوبك، وGrok Bot يسوي الشغل.
- يكمل المهمة وأنت مو موجود، حتى لو جهازك مقفل.
- يكرر المهام لحاله بمواعيد تحددها، مثل ملخص كل صباح.
- يوقف ويسألك قبل الخطوات المهمة.
كيف تستفيد منه في يومك
أمثلة من الحياة اليومية، انسخ الطلب وعدل اللي بين القوسين.
ملخص الصباح
كل يوم الصبح يرسل لك ملخص لإيميلك ومواعيدك عشان تبدأ يومك وأنت عارف وش عندك.
«كل يوم الساعة 7 الصبح، لخص لي الإيميلات المهمة اللي جتني ومواعيدي اليوم، وقل لي وش يحتاج رد مني.»
مواعيدك وتذكيراتك على الجوال
يرتب لك التقويم ويحط التذكيرات بدل ما تتذكرها أنت.
«حط لي موعد [الموعد] يوم [اليوم] الساعة [الوقت]، وذكرني قبله بيوم وقبله بساعة.»
قارن قبل ما تشتري
يدور على المنتج في أكثر من متجر ويقارن السعر والتوصيل، وأنت تقرر.
«قارن لي سعر [المنتج] في [المتجر الأول] و[المتجر الثاني]، مع رسوم التوصيل ووقته، ولا تشتري شي.»
خطط لرحلتك
يجمع لك خيارات الرحلة في مكان واحد عشان تختار بسهولة.
«أبي أسافر [الوجهة] من [التاريخ] إلى [التاريخ]. جهز لي خيارات طيران وسكن بميزانية [المبلغ]، وقارن بينها، ولا تحجز شي إلا بموافقتي.»
يحضر الاجتماع بدالك
إذا ما تقدر تحضر اجتماع، يدخل بدالك ويعلمهم إنه حاضر عنك، ويكتب ملاحظات ويرسل لك ملخص.
«احضر عني اجتماع [الموضوع] اليوم الساعة [الوقت]، وعلمهم إنك حاضر بدالي، وارسل لي بعده ملخص بأهم النقاط والمطلوب مني.»
تابع موضوع أو أخبار على X
يتابع لك اللي ينكتب عن موضوع يهمك ويلخصه لك.
«كل مساء، دور في X عن أهم اللي انكتب عن [الموضوع] اليوم، ولخصه لي في نقاط مع روابط المنشورات.»
صفحة تقرير أو متابعة
يسوي لك صفحة مرتبة فيها أرقامك ومهامك، ويحدثها أول بأول.
«سو لي صفحة أتابع فيها [المصاريف/الأهداف/المشروع]: جدول بالأرقام وملخص بسيط، وحدثها كل أسبوع.»
للمعلم والطالب
ينظم لك الدروس والواجبات والمواعيد في مكان واحد.
«سو لي صفحة فيها جدول دروسي هذا الأسبوع ومواعيد تسليم الواجبات والاختبارات، وحط لي تذكير قبل كل موعد تسليم بيومين.»
من أبرز مزاياه، وكيف تستخدمها
كل بطاقة فيها طلب جاهز، انسخه وعدل اللي بين القوسين.
كمبيوتر خاص فيه في السحابة
عنده كمبيوتر سحابي خاص فيه يشتغل عن بعد، فيه متصفح وبرامج. تقدر تفتح شاشته وتشوف وش يسوي، ويكمل الشغل حتى لو قفلت جهازك.
«ادخل موقع [الجهة] وعبي لي [الطلب أو النموذج] بالمعلومات هذي: [المعلومات]. ووقف قبل الإرسال عشان أراجعه.»
يشتغل داخل مواقعك ويرجع لك عند اللازم
إذا طلع له رمز تحقق أو صورة "أنا لست روبوت" يرجع لك تكملها. وكلمات المرور ما تكتبها في المحادثة، يرسل لك خانة آمنة لها.
«ادخل حسابي في [الموقع] وجيب لي [الفاتورة أو المعلومة]. وإذا طلب رمز تحقق أو كلمة مرور، ارجع لي.»
تقويم الجوال والتذكيرات وجهات الاتصال
صار يقدر يستخدم التقويم والتذكيرات وجهات الاتصال وتطبيقات ثانية في جوالك، على الآيفون والأندرويد (الميزة تنتشر تدريجيًا، وتسمح لكل تطبيق لحاله).
«شوف تقويمي لهذا الأسبوع، وحط لي تذكير قبل كل موعد بساعة، وإذا فيه موعد مع شخص مو محفوظ عندي ضيفه لجهات الاتصال.»
تقارير ولوحات متابعة
تطلب منه صفحة فيها تقرير أو مذكرة أو لوحة أرقام، وتعدلون عليها مع بعض، أو تخليه يحدثها بنفسه أول بأول.
«سو لي صفحة فيها ملخص [المشروع]: وش انتهى، وش باقي، والأرقام المهمة. وحدثها كل يوم الصبح.»
مهام تتكرر لحالها
تحدد له موعد، مثل كل يوم الصبح، أو تخليه يشتغل لما يصير شي معين، مثل رسالة جديدة توصل في تطبيق تستخدمه.
«كل يوم عمل، شوف المحفوظات حقتي في X، واختر لي فكرة وحدة تستاهل التجربة، وانتظر موافقتي قبل أي خطوة.»
علّمه مرة وحدة
من تطبيق الكمبيوتر اضغط "Teach a task" وسو المهمة قدامه مرة (لين 10 دقايق). يحولها لمهارة تراجعها وتجربها، وبعدها تخليه يكررها بموعد. الميزة تنتشر تدريجيًا.
«حوّل المهمة اللي علمتك إياها لمهارة، وبعد ما أجربها شغلها كل [الموعد].»
فريق بوتات يشتغلون مع بعض
تقدر تسوي أكثر من بوت، كل واحد له شغلة، وتجمعهم في محادثة وحدة يتكلمون فيها ويوزعون الشغل بينهم. وتقدر تسوي بوت مشترك لفريقك كله، يعرف نفس الملفات والأدوات، وكل شخص محادثته معه خاصة، ويقدر يدخل معكم في Slack.
«سو لي فريق من ثلاث بوتات: واحد يجمع الأخبار عن [الموضوع]، وواحد يكتب ملخص، وواحد يراجعه. خلهم في محادثة وحدة، ولا ينشرون شي إلا بموافقتي.»
من X مباشرة
يبحث في منشورات X حتى بدون ربط حسابك، ولو ربطت حسابك يتابع المنشن. وإذا كتبت @bot في منشور أو رد، يوصل الطلب لبوتك الرئيسي ويشتغل عليه، والنتيجة توصلك في تطبيق Grok Bot. يحتاج ربط حساب X بحساب Grok، وغير متاح في بعض الدول.
«@bot لخص لي الردود على هذا المنشور في أهم الأفكار.» (اكتبها رد على المنشور في X، والملخص يوصلك في تطبيق Grok Bot)
ابدأ صح في 5 خطوات
- 1حمّل التطبيق
يحتاج اشتراك مدفوع مثل SuperGrok. تطبيق الجوال من App Store أو Google Play، وتطبيق الكمبيوتر من صفحة Grok Bot الرسمية.
- 2عرّف البوت
اعطه اسم، ووصف واضح لشغلته مثل ما تسويها أنت بالضبط. كل ما كان الوصف أدق كانت النتيجة أحسن.
- 3اكتب له القواعد
من الإعدادات، اكتب بكلامك وش مسموح له ووش ممنوع، ومتى لازم يرجع لك قبل ما يسوي شي.
- 4ابدأ بشغلة تعرفها
اختر مهمة تسويها أصلا وتعرفها زين، عشان تعرف تحكم إذا سواها صح.
- 5خله يشوفك مرة
من التطبيق على الكمبيوتر، علمه المهمة مرة بزر "Teach a task"، راجع المهارة اللي يسويها، وبعدها خله يكررها بموعد ثابت.